Ni miaka saba sasa tangu Marioo aachie wimbo wake wa kwanza 'Dar Kugumu'(2018). Licha ya kuwa wakati msanii huyo anaingia kwenye game aliwakuta nyota wengine waking'ara kama vile Diamond Platnumz, Alikiba, Harmonize, Rayvanny na wengine lakini amekuwa na mafanikio kwenye muziki wake.

Mafanikio hayo ni pamoja na kupenya kutoka nje ya mipaka ya Tanzania kimuziki, kuachia ngoma zinazofanya vizuri kwenye masikio ya mshabiki, kumiliki msanii na hata kuachia albamu.

Utakumbuka mwaka 2020 akiwa na miaka miwili tu tangu aachie ngoma yake ya kwanza, Marioo aliachia wimbo wenye midondoko ya amapiano 'Mama Amina'. Wimbo huo uliingia kwenye orodha ya nyimbo bora za Kitanzania za muongo huo kuanzia 2012-2022.

Hata hivyo nyimbo zingine za amapiano kama vile Dear Ex, Bia Tamu, Lonely na Hakuna Matata zimeashiria hadhi yake kama mfalme wa Amapiano ya Kiswahili.

Desemba 2021, Marioo aliachia Mi Amor akishirikiana na Jovial kutoka Kenya. Wimbo ambao ulikuwa moja ya nyimbo maarufu zilizomtambulisha zaidi Afika Mashariki huku video ya wimbo huo ikawa ya pili nchini Tanzania kutazamwa zaidi kwenye Youtube mwaka 2022.

Aidha juhudi zake zilifanya Jarida la Rolling Stone kumuorodhesha kama msanii namba 39 kupitia wimbo wake wa Mi Amor Ft Jovial kwenye nyimbo 40 bora za Afropop kwa mwaka 2022.

Aidha mwaka huohuo 2022 alitoa albamu yake ya kwanza 'The Kid You Know'. Albamu hiyo yenye nyimbo 16 ilimpa nafasi ya kufanya kazi na wakali mbalimbali wa muziki kama vile Rayvanny, Tyla, Harmonize, Alikiba na wengineo, huku albamu hiyo ikimpa nafasi ya kuingiza nyimbo zaidi ya tano kwenye chati kubwa za muziki nchini.

Marioo hakuishia hapo, Mei 2023 alitoa Toleo la Deluxe la The Kid You Know ikiwa na nyimbo tatu za ziada ambazo ni Sing, Kesho na Tunamjua.

Hata hivyo 2024 kwake haukuwa mbaya kwani alifanikiwa kushinda tuzo mbili usiku wa Tuzo za Muziki Tanzania. Alijinyakulia katika vipengele vya Msanii Bora wa Bongo Fleva na Mwandishi Bora wa Mwaka.

Pia mwaka huohuo aliachia albamu yake ya pili 'The Gods Son' ikiwa na jumla ya ngoma 17. Albamu ambayo inatajwa kuwa na mafanikio makubwa tangu kuachiwa kwake mpaka sasa ikiwa na miezi mitatu lakini tayari imeweza kuingiza nyimbo zaidi ya tano kweye chati mbalimbali za muziki nchini.

Albamu ya TGS inaendelea kumuweka Marioo kwenye ramani kubwa ya kimuziki kutokana na mafanikio yake akifanikiwa kutengeneza Hits, huku kila shabiki akijinyofolea ngoma yake pendwa kutoka kwenye albamu hiyo.

Marioo kaendelea kupata mafanikio makubwa baada ya kuachia albamu yake ya TGS hususani kwenye majukwaa ya kidigitali.

Kwenye mtandao wa YouTube wimbo 'Wangu' akimshirikisha Harmonize umetazamwa mara milioni 4.2, Nairobi Ft Bien umetazamwa mara milioni 4.2 ndani ya wiki tatu, No One ft King Promise umetazamwa mara 665k, My Daughter umetazamwa mara 709k.