Ikiwa leo ni kumbukizi ya siku ya kuzaliwa aliyekuwa mwanamuziki wa Afrika Kusini marehemu Kiernan Forbes 'AKA', familia yake imeendelea kumkumbuka huku mama yake akishusha ujumbe.

Kupitia ukurasa wa Instagram wa Lynn Forbes ambaye ni mama mzazi wa AKA amemtakia kheri kijana wake huku akidai kuwa tukio hilo haliwezi kuondoka moyoni mwake.

“Siku hii, saa 1:15 asubuhi na mapema, nilisikia kilio chako cha kwanza, nilihisi joto lako ulipokuwa umewekwa kwenye kifua changu. Kuzaliwa kwako kwa asili, miaka 37 iliyopita, kuliniacha nimechoka bado nikiwa na nguvu. Sikuweza kuondoa macho yangu kwako. Kuhesabu kila kidole kidogo cha mguu, kila kidole kidogo.

"Mtoto wangu mdogo wa kiume, mzaliwa wangu wa kwanza. Mikono yako wazi, miguu mirefu ikining'inia. 2.75kg, 54cm. Mkamilifu sana, mwingi wa ahadi, uliniacha kwa mshangao. Wakati huo, moyo wangu ulibadilika milele, umenifanya mama. Nilikuwa wako, na wewe ulikuwa wangu. Uhusiano usioweza kuvunjika, upendo usio na kikomo,” aliendelea Lynn Forbes

Mbali na mama huyo, kuachia ujumbe huo pia baadhi ya watu wa karibu akiwemo baba yake Tony Forbes, kaka yake Steffan Forbes, na binti Kairo Forbes walimtakia kheri marehemu msanii huyo kupitia mitandao yao ya kijamii.

Mwanamuziki na mfanyabiashara AKA aliuawa pamoja na rafiki yake Tebello "Tibz" Motsoane kwa kupigwa risasi nje ya mgahawa huko Durban February 10, 2023.

Ikumbukwe kuwa Februari 28, 2o24 Mahakama ya Durban nchini Afrika Kusini iliwakamata washukiwa wa mauaji ya staa huyo walitambulika kwa majina Siyanda Myeza (21), Lindokuhle Ndimande (29), Lindani Ndimande (35), ambao ni mtu na kaka yake, Lindokuhle Thabani (30) na Mziwethemba Myeza (36) huku kesi hiyo ikiendelea kufanyiwa uchunguzi mpaka sasa.

AKA alizaliwa Januari 28, 1988.